في يوم كان الجو حار محرحر.. نو هللللبة.. الجبهة من العرق اتقطر.. بس من زنقة الريح لو انك تخطم.. تلقاها تنعنش باردة.. تقول شتى والسمى بتمطر..  هداكه اليوم الجو في طرابلس في طاعة الله.. يفدد.. تلقى الواحد في جامع درغوت والا الناقة متمدد.. مسيكين من النو هارب وجاي يبي يبرد.. في جوامع المحروسة طرابلس بعد الصلى.. الناس تتجمع وتتلاقى.. اللي مش بال راسه.. مشمر على ساقه.. راقه راقه.. مفرشين حصاير في التقى والظل.. ناس قلوبها صافية من بعضها ما تمل.. ناس رغم العازة والفقر خيرهم ديمة يهل.. ويصير بينهم حديث وكلام في هاذيك القايلة.. وكلهم يشكي لله من الحالة المايلة.. مرات يجيهم واحد يجيبلهم دلاعة.. تبرد عليهم في هاديك الساعة.. طول  يقسموها بينهم لانهم مساكين جواعه.. كانت الناس تتفقد وتحس ببعضها.. الغني فيهم عارف سعد الحاجة في عطاها.. واللي شد نفيسته راهو غناها.. اما صغار الحارة تلقاهم على شط البحر شادين طاجين.. يراجوا ويدعوا.. الرزق على الله.. منين بيجيهم مش عارفين.. الصغير فيهم يدعي والكبير يقول امين.. يا الله يا الله سخر لينا قلب حنين.. دوره يجي واحد من الحواتة  خاطم بفلوكته  بعد ماتمت توكته.. وهوه يضحك طالق عبيسته.. مروح بعد عبى قفيفته.. يشوفهم ويحن عليهم امساكين.. يمدلهم المكتوب مرات سردينة ومرات كوالي.. والا مغزل ومرات دوت.. والصغار ملمومين عليه كيف الخوت.. داهنين طاجينهم بشحيمة يقلوا بيها الحوت.. وبعد يعطيهم  طول يمشوا جيهة بحر بوليلة.. غادي حق سمحة التقييلة.. ويبدو عاد في قلي الحويتات.. مدايرين جو مع بعضهم ومايروحوا الا اخر العشيات.. وهمه في غاية الانبساط.. اما قهوة شيخ البلاد ما تسخن الا مع العشية.. بعد ماتكون الناس قيلت وغفت شوية.. تتعبى ويكثر فيها الناس.. اشكال الوان.. محسوب فيه اللي مدايرها ليه عنوان.. وهات ياقهوة وياشاهي ولا عصير الليمون.. ويمر بينهم اللي يبيع الهندي والبرد  بالكشي يحصل  زبون.. ماهو عارفين الحكاية هداكه الوقت كيف بتكون.. بس مرات يطيروها للجرسون.. يتغشش عليهم.. يلزهم ومايلقووش منو عليه يمون.. وخودلك عاد من يخشلهم  فيها.. شكون وشكون.. لين يرضى ويطيب خاطره عليهم.. بعد مايكونوا اعطوه المعلوم .. في القهوة من الزحمة اللي مايحصلش كريسي.. ايومر على مكانه بخطوط.. والا يقعمز في مكانه مايتحركش تقول مربوط.. وهذا كله لان بعد شوية بيجي الفنان بشموط.. بيقدم وصلته هوه وفرقته.. فيه سميعه هلبة يحبوه.. وعلى خاطره من بعيد يجوه.. وبعده بيجي الحكواتي.. وفي وصلته الناس تقعمز وين يواتي.. الناس تحب تسمع القصص والحكايات.. ولو تلقى في القهوة تبات.. كانت حكاياته على بوزيد الهلالي وخوته.. والجازية والزناتي خليفة وكيف كانت موته.

اما خونا لطفي وصاحبه فكري كانوا جيهة سيدي عبدالوهاب.. واخدين تركينة ويهذرزوا محسوب اصحاب.. مقابلين البحر.. والموج مرة مرة يتحرك يضرب في هداكة الحجر.. يبعث نسمات باردة تلطف الحر.. (فكري يسئل لطفي وهو ينظر الى البحر).. نشوف في شقفة والا قربيطة جاية من بعيد زعمة لمنو؟.. (لطفي).. توة تقرب ونشوفوا البنديرة اللي رافعتها بعدها نقدروا نعرفوها لشكون  (فكري) لو كان جايبة قمح والا شعير.. اكيد بترسي تحت سيدي عبدالوهاب.. وبنكونوا عليها قراب.. ماهو هنى التجار يسلموا في بضاعتهم ويتم الحساب.. (لطفي) ياسيدي توة توصل ونعرفوها.. (فكري).. حقه مش كلامك طلع صحيح اللي قلته بكري.. (لطفي).. ان شاء الله خير.. ياطير.. شنهوه اللي انى قلته وخطر على بالك توة وجبته. (فكري) مش السي محمد الذاقيز تنحى من لزمة البطانة والصابون (لطفي) لا هادي تبي الكانون.. اه ريت مش قتلك.. اهو انت لكلامي جيت.. وانتم يومها ما اقتنعتوا  بكلامي لين خليتكم ومشيت (فكري).. لا الكلام هذا قوله لناجي.. اما انى مش متفاجي.. (لطفي).. تعرف ياصاحبي.. الباشا هذا مش حيصيرله طيب.. لان قانط على الناس لا رخى ولا هو سيب (فكري) لكن انت ماسألتش منو جابوا بعده (لطفي) شكون بيكون يعني..؟ اكيد واحد يفهم في المسلخ وجلد الغزال.. هلبة تجار يدوروا في ها لمصلحة ويبوها مازال (فكري) اللي خدى اللزمة المرة هادي محمد القاجيجي  (لطفي).. زعمة بقداش رسيت عليه.. فجيوة فيه.. (فكري).. خداها بـ 12 الف دورو..  وان شاء الله المرة هادي تكون سوقورو.. (لطفي).. ياودي خلطة الباشا صعيبة.. والفرقة معاه ديمة قريبة.. (فكري).. تعرف وقول قالها.. الباشا حيموت مفلس ومايلقاش حتى منو يدفنه.. هذا كان لقى مني يكفنه.. (لطفي).. ماتقولهاش ياراجل بالكش يتوب ويرجع ولكلام الحق يجي ويسمع.. (فكري).. ياودي اللي خدت نفيسته على الحرام.. مايقدرش يغلبها ولا يقدر يسيب عادته بجرام.. اللي مايرحمش ناسه اكيد خارب ساسه.. انت ماتعرفش قداش خدى من الدول البرانية في مدة ثلاث سنين.. ميزانية.. (لطفي).. قداش زعمه؟؟ (فكري).. لو انقولك ماتصدقش.. (لطفي).. لا قول.. وانت امام الله على كلامك مسئول.. (فكري).. ايح خرف الكلام هذا يعرفوه كلهم من غير مانقول.. (لطفي).. تي باهي خش في الكلام طول.. (فكري).. قالوا من اسبانيا بس خدى 41 الف قرش.. و5 الاف من نابولي من غير الفرش.. و23 الف قرش من البندقية.. ومن امريكا 49 الف قرش حقانية.. و4 الاف قرش من راجوس اليوغسلافية و97 الف قرش من الدنمارك و77 الف قرش من السويد هذا من غير حاجات حربية بعثوهاله قيمتها بـ 23 الف قرش قيموهاله.. هذا من غير الهدايا وهلبة عطايا (لطفي).. ايه باهي هادي دولة وعندها هلبة مصاريف وشغل.. (فكري).. لكن ناس هالدولة كلاهم الفقر والقمل.. مش المفروض ينوبهم من الخير نصيب.. ولا كلها تمشي للبراني والغريب.. (لطفي).. تبي الحق الباشا ليه سطوة ويحاسب في الاوروبيين خطوة خطوة.. انت عارف شن صار للسويد لما طلب منها تدفع.. ولبرتوكوله ترجع.. كانت ليه هيبة وامتى مايبي يضرب ويوجع.. يومها طلب من السويد مية الف فرنك.. والا يصيرلها الفنك.. ويكونوا عطية.. وتزيد عليهم ثمانية الاف ضريبة سنوية.. يومها القنصل امتاعهم رفض.. وماقبلش اللي عليه انعرض.. تعرف الباشا شن دارلهم.. بعثلهم اسطوله وحاصرهم.. وصلوا للساحل السويدي.. يحسابوه يلعب ياوليدي.. وروح بسبعة سفن تجارية ليهم.. مع بحارتها يا حى عليهم.. ويومها السويد شكت لنابليون بونابرت اللي توسطلهم عند الباشا وطلقلهم السفن مع بحارتهم.. ضربة الحق وجعتهم.. دفعوا اللي عليهم.. بعد خافوا من النار تجيهم.. (فكري).. هذا كله ماوصل منه شي للفقير.. مافلح غير في الضرايب ومايهمه غدوة شن بيصير.. (لطفي).. هذا نصيب طرابلس وهذا سعدها.. (فكري).. مسكينة مابعدها.. طرابلس ديمة متلقيتها.. ادعي الله يرفع عليها بلوتها.. (وهمه هكي يهذرزوا حتى وقف عليهم ولد براهم.. قالوله بعد شبحوله).. ان شاء الله خير ياترزين.. هيا تعالى قعمز ليك وحشة ياالحنين.. (ترزين).. ايح انتم وين وانى  وين.. (قالوله).. شنو فيه.. ان شاء الله خير.. (ترزين).. اندور في بوي شاهول.. من بكري واني اندور.. مشى للسراية ولتوة مروحش.. (قالوله).. هيا هادي الحكاية.. ماتخافش على بوك.. راهو صاحب الباشا.. (ترزين).. خايف يكون فيه حد ناشا.. المحسدية هلبة.. والحكاية على سبلة.. (قالوله).. ياودي ما ادير شي في بالك.. اكيد تلقاه عند عمك والا خالك.. (ترزين).. لا.. مشيتلهم وقالوا ماجاناش.. ومش عارف كيف ولا باش.. لان الحارة معبية الفاع واحناش.. (قالوله).. ياسيدي هيا واهو احنى معاك.. هيا ندوروه.. (ترزين).. زعمة وين بنلقوه.. (قالوله).. اكيد نلقوا حد شافه.. مرات في الطبرنة بوك معروف نشافة.. (ترزين).. ياودي مشيتلها وقالوا من مدة مسيبها.. (قالوله).. ياودي غير هيا بالك.. (ترزين).. لوين.. انتم عارفين والا غير هكي فزعة عربي قامزين.. (قالوله).. اه هكي مانتفاهموش.. أحنى صاحبنا نحطوه في الرموش.. (ترزين). بالشوي عليكم.. فيسع هكي ولعتوا. انى نبصر مع اصحابي.. (قالوله). وحتى احنى نبصروا.. اليهودي كان بتغلبه غصوروا.. (ترزين).. اب اب ماتفوتوا شي ياصحابي.. اس اس اهو بنحاس ولد رحمين جاي (وهما هكي وقف عليهم بنحاس ولد رحمين).. (قالوله).. خيرك تنين.. (بنحاس).. ياصحابي ندور في بوي الحنين.. (قالوله).. لا هكي صار الملعب كبير.. والحكاية تبي تفكير.. (بنحاس).. ان شاء الله خير.. (قالوله وهمه يشوفوا للقادم).. وهذاكه اللي نازل من زنقة الفرنسيس.. مش ولد تمحميس؟!.. (قاللهم وهو يتمعن فيه).. ايه هوه.. زعمة شن طلعه توة.. (قالوله).. الباين نفس الدوة.. اكيد حتى هوه طالع يدور على بوه.. حكايتكم ياصحابنا كبيرة هادي فيها وووه.. وتوة عرفنا وين بنمشوا.. هيا تعالوا للشيخ احمد محسن عليه نخشوا.. وللحديث بقية.

المنتصر خلاصة

راجع الحلقات السابقة بـ (ارشيف الكاتب)