مقالات

المنتصر خلاصة

حياة الطرابلسيين وقهوة شيخ البلاد [2]

أرشيف الكاتب
2022/06/21 على الساعة 19:29

القهوة هداكا اليوم كانت زحمة.. بس مازالت الدنيا بخير ومازالت الرحمة.. مازال تلقى من ياخد بخاطر اللي معنداش ويخلص عليه.. وإلا يعزمه على طويسة سمحة.. هادي طرابلس الخير.. وهادي طرابلس الفرح.. وهادي عوايد اماليها.. نية صافية وقلب كبير.. يارب كثر وزيد اعطيها.. طرابلس بحبها.. وودها.. تغلب الواحد كيف مايجيها…

لما خش لطفي.. لقى قدامه صاحبه فكري.. واخد كرسي الباين عليه جاي امبكري.. قعمز بحداه (وقال).. الله الله.. خسارتك ياعمري.. الباين ضيعتك وانى ماندري.. شبحله فكري وهو مستغرب (وقاله).. غير بالشوي عليا.. الباين عليك واجعك خاطرك مني.. ونفيستك مش هيا.. (قاله).. تبي الحق.. انت ماتجيش صاحب بعد خليتني على بابك عييت وانى اندق.. وينك ياصاحبي؟.. وين موعدك؟.. وين كلامك؟.. (قاله).. اللي يسمعك يقول درتها فيك بلعاني.. توة  انى معقوله نرخيك!.. اكيد فيه شي مستعجل جاني.. وافهم.. قبل ماتحكم.. وتظلم.. وتقول صاحبي مشى وخلاني.. (قاله).. الخاطر يعرف على شكون بيلوم.. هيا مش غير كلمات.. للصحبة عهد غالي السوم.. ولا تحسابها تهدريزة تنتسى بعد مايجيك النوم.. راهي المحبة قلوب.. متلحفة بالود.. كلام طيب معاه اسلوب.. مش رويق ولا كلام مزوق لو تمعنت فيه تلقاه كله عيوب.. (قاله).. لا.. لا.. ماتقوليش.. انت اكيد خاطرك من جيهتي متكدر.. ولو عرفت السبب ياصاحبي راك ليا تعذر.. (قاله).. ياسيدي قول عذرك.. بالكش الود يرجع لصدري وصدرك.. (قاله).. لو تحكي على يوم الخميس اللي فات.. يوم تفاهمنا انك بتجيني وعندي تبات.. وفي هداكا الوقت بالذات.. جتني عزومة.. لا كانت على خاطري.. ولا هي مرسومه.. خطم عليا.. انت تعرفه.. سلومه.. شد فيا وترجاني باش نمشي معاه في القفة.. ضحك فكري وقال.. زمزامة ولقت عرس.. وانت عاد ادور فيها دواره.. عوايدك ومنو يغلبك في الحاره.. (قاله).. لا والله بجد.. وفكنا من البصارة.. وشن تبيني انقول لما الجار يقصد جاره.. (قاله).. باهي ياسيدي قفة شكون اللي جاتك على غفلة ؟.. أكيد كانت كبيرة الحفلة .. (قاله).. انت ماسمعتش بيها ولا كيف؟.. (قاله).. لا ماسمعتش قفة منو اللي مشيت فيها.. (قاله).. ياسي لطفي.. مشينا في قفة خليل ولد مصطفى الشلي واسئل عليها عاد ولا خلي.. قفة ماشاء الله ربي يبارك رفعناها لحوش حسن القاجيجي.. وغادي شدونا.. وما بو يطلقونا.. لين من كل شي اعطونا.. الحق غاية الكرم كرمونا.. وقداش تمنيت انك تكون معانا على الاقل قضيت وقت طيب.. زغاريط ونوبة وماكلة تتمناها لكل حبيب.. (قاله).. صحة ليكم صحة.. عيلة الشلي والقاجيجي من خيار الناس ومعروفين بأصلهم الطيب.. بس ياسيدي حتى انى اللي اعطاك عطاني.. وماقعدت وحداني.. الخير لفم بابي جاني.. (قاله).. بحبح ياسيدي بحبح.. هي باهي.. قولنا شن صار معاك.. (قاله).. انى لما جيتك ومالقيتكش.. روحت.. وشوية جاني صديق.. فرج عليا الضيق.. بعد مالقاني متغشش شايط عندي  الريق.. مشيت سهرت معاه في سيدي المصري.. والله ياصاحبي كانت ليلة كنت فيها سلطان عصري.. (قاله).. وشن رفعك غادي في هداكا الخلى الخالي.. (قاله).. الخلى الحقاني.. خلى القلب.. من الصفاء والحب.. العبد مادام مع ربه وسيده.. مافي شي يغلبه ويكيده..  صاحبي هذا كان من الزواوية (محاربين من المغرب العربي يستعين بهم الباشا ضد اعدائه).. مع جماعته مدايرين سهرة حقانية.. ذكر وعشى على خاطر بعض البهوية.. قاله ومنو من البهوات جاكم.. وبات في  الخلوة حداكم.. (قاله).. جى محمد المكني باي فزان.. راجل محب من الاخيار.. مرة مرة يدير في مزار.. بات في خلوة  سيدي المصري.. قالولي هذا المكان يحبه.. يتبرك بيه حاطه في قلبه.. ومافي مرة وهو مروح لفزان الا وبات جنبه.. ياصاحبي كانت ليلة ولا الف ليلة.. ليلة ذكر وتسبيح وقرأن.. وبعدها جى العشى لحم وخبزة ودهان.. وحلوى ولوز وبخروا الجاوي مع اللوبان.. صنه طيبة.. خلوه فايح هداكا المكان.. (قاله).. باهي اهو حتى انت عشت ايامك.. امالا علاش تلوم ومكشر وبارد سلامك؟!…

(وهما هكي قطع حديثهم واحد).. خش للقهوة والناس على سهوة وهو بالصوت العالي (يقول).. ياجماعة ياجماعة.. ماسمعتوش.. مش الذمي غويلي حوله الباشا من رياسة البطانة والصابون. (مكملش كلامه لين جاه يجري الجرسون).. وهويشاورله بيده (ويقوله).. غير شن تقول.. وطي حسك يامهبول.. تكلم بالشوية الدنيا راهي مخلطة والحكاية مش ناقصة.. خود كرسي وقعمز حدانا.. واحكيلنا بالشوية منو اللي جابه مولانا.. باش يكون في مكانه…

رد عليه وهو يهمس للجماعة: جابوا.. السي سالم العرادي.. عرفتوه.. هذا هوه اللي قالوا جابوه.. (قاله فكري).. كيف لا.. هذا راجل معروف.. ايدير في الخير ويساعد في اللي عنده ظروف.. يستاهل سالم العرادي.. قداش مرة سمعوا الباشا يقوله انت محسوب زي اولادي… 

(رد عليه لطفي): باهي وماقالوش بقداش خداها.. ولو كنت مكانه بارة مانعطيها.. الباشا راهو ماهو ساهل.. وعلى الفلوس مايتماهل.. (قاله).. خداها بثمانية الاف دورو.. (رد عليه لطفي).. ياودي من توة انقولك الحكاية مش سوقورو.. تي هوه اليهودي ماقدرش عليها بخمسة الاف بيقدرها عربي بثمانية الاف.. وهه قولوا لطفي قالها حيجي يوم ويطلبه الباشا في السانية.. وينحيه ويجيب غيره مرة ثانية.. (قاله فكري).. الباشا مايهمه غير الفلوس.. على خاطرهم يقطع الروس.. هذا علاش متعرقله الامور.. لانه السراية معبية بالسوس… 

(هنى لطفي طلب من الجماعة يغيروا الحديث) وقال: بالله عليكم غيرونا هالحديث ياجماعة.. وقولونا حتى على اخر اشاعة.. لأن في القهوة فيه هلبة سماعه.. ولا انقوللكم.. شكون منكم.. سمع باللي روح من الحجاج.. (رد عليه فكري).. انى سمعت.. من لما من الحوش طلعت.. انه الحاج محمد الموقت روح هوه والحاج علي القريو لاسو لاسوية.. صحيحين وحجتهم ان شاء الله مجزية.. وجت مرواحتهم على طريق بر بنغازي.. (قاله لطفي).. صار جوو من طريق بنغازي.. صحه ليهم ربحوها الحجة وربي يتقبل ويجازي.. يا ريتني نمشي للصفا والمروى.. نشرب من زمزم لين قلبي يروى.. ونزور النبي العربي.. صلى الله عليه وسلم.. هيا ياجماعة منو فيكم يبي يمشي معاي عليهم ايسلم.

 المنتصر خلاصة

- راجع: حياة الطرابلسيين وقهوة شيخ البلاد [1]

 

كلمات مفاتيح : طرابلس،
لا تعليقات على هذا الموضوع
آخر الأخبار
إستفتاء
ما التقييم الذي تسنده لـ"السقيفة الليبية" (بوابة ليبيا المستقبل الثقافية)
جيد جدا
جيد
متوسط
دون المتوسط
ضعيف
كود التحقق :
+
إعادة
لمتابعة ليبيا المستقبل
جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع