فنون وثقافة

سلام لبلادي… (قصيدة: محبوبة خليفة)

محبوبة خليفة | 2017/07/21 على الساعة 15:04

صباح السلام  لبلادنا  جمليَّه
صباح من مُحبَّه وعاشقه وليبية
صباح السلام الدايم
من قلب ديما في هواها هايم
ينبض غلا وشوق ورجاء
ووينبض تمنّي "للعزيز عليَّ"

***

ياوطنّا  ديما
صباحك رايق
صباح بالفرح
يسعد اللي متضايق
إيجيه الفْرَج
ياعين طيبكْ جيَّة

***

صباح النوارس  ماليه ميدانك
يام السرايا والزها عنوانك
ترفرف بهيهّ
رغم الألم تشتاق  للحريّه

***

صباح الحنين
اللي غلاها كيف نورالعين
وللي الودايد فيك ملتمّين
(بنغازي) صباحك زين
صباحك جميل محلاه مُشرِقْ ضيّه

***

صباح محنَّة
صباحك زهَرْ وورود نسمة جنّة
صباحك زها وصباحك هناء
صباحك قلب مُحتَلّ !!
وسطَهْ (درنة)
صباح ليبيا بحروف درناوية !

***

صباحي  ناير
صباح العمر نبّيه
نمشي زاير
يسعد حياتي دوم
ملقى هَلْها
(سبها) العزيزة
خاطري نوصلها
بنت  الصحاري
بالجَمال نَدِية

***

صباحك زين
صباح الغوالي فيك ملتمّين
جمال الصبايا دوم واضح فيها
وردة بلادي ربنا يحميها
 (زوارة)
على طول الزمان
 باب  الوطَنْ في حاضرَه وماضيَّه
صباح السلام على بلادنا جملية
صباح من مُحبَّه وعاشقَة وليبيةً

***

صباحك جميل يازاوية نَزْهابكْ
وين مايقولوا زاوية ويطروها
قلبي المُعَنّى بالودايد جابكْ
وللشاعرة رفقة وما ينسوها
تعتبْ عَلي وتقول طال اغيابك
وفي الزاوية تسكن ابنيّةْ بوها*
صباحك جميل
يالزاوية  البهيَّة
صباح من مُحِبّة وعاشقة وليبية

***

صباح الغلا كلّه لباقي هلْنا
جميع المدن في ليبيا مسكنّا
من غربها لشرقها
 لجنوبها ماجملنا
ندعي المولى ياكريم اشملنا
برحمَة ومحبَّة
وشوي  إنسانية  
***

صباح السلام  لليبيا جملية
صباح من مُحِبَّة وعاشِقَة وليبية

محبوبة خليفة

* شقيقة الشاعرة

كلمات مفاتيح : شعر، محبوبة خليفة،
د.نافع بدر | 24/07/2017 على الساعة 22:32
تحية للشاعرة / محبوبة خليفة
يبدو ان قصيدة الكاتبة الهبت حماس بعض الشعراء ، وأتطلع الي ان اقرأ لها المزيد ؟! هل لدي الأخت الكاتبة كتباً متوفرة في الاسواق وهل لديها قصائد شعر حر ؟! ارجو الإجابة وشكراً
شاعر | 24/07/2017 على الساعة 13:52
" يا فرحتك يا عين .. جاك غزالك بعد شردته علي العين .. رجع ولاّلِك !!"
اهداء الي الأخت اللبيبة الام وغزالتها الطرابلسية والشاعرة وكل القرّاء جميعاً .. ودمتم بخير في بلادنا " بلد الطيوب " ، تحياتي
متابع | 24/07/2017 على الساعة 11:49
ما خاب ظنهن لنظار ..
اشكر الأديبة الشاعرة علي كرمها في الرد علي سؤالي ...والي لقاء قريب علي صفحة مجلتنا المتميزة " ليبيا المستقبل " وأشكر كذلك مدير التحرير أديبنا الفاضل حسن لامين وجميع أسرة مجلتنا العاملين معه ، وتحياتي للقراء جميعاً !!
محبوبة خليفة | 23/07/2017 على الساعة 22:07
شكر للمعلقين
شكراً جزيلاً ل م ب -ولليبية الأم - وللأخ الشاعر. على رأيهم ومتابعتهم ممتنّة لحضراتكم جميعاً
محبوبة خليفة | 23/07/2017 على الساعة 22:01
رد على متابع
أشكر إهتمامك ورأيك. وأؤكد لحضرتك أنني لم أكتب في السنوات الأخيرة تحت أي إسمٍ آخر غير إسمي أعلاه ..
متابع | 23/07/2017 على الساعة 16:27
سؤال أرجو الإجابة من الكاتبة عنه ؟!
عذرا اختي الكاتبة ،قرأت لك قبل مدة بعض المقالات الأدبية وقد أعجبت بجلّها ان لم يكن كلها، لكن هل كتبت من قبل مقالات بإسم أخر ؟! ،رغم انني اعلم ان من حق الكاتب ان يكتب تحت اسم يختار ؟! ،ارجو منك الإجابة ؟ وشكراً اختي علي الإجابة عن سؤالي !!! تقبلي احترامي وتحياتي
م.ب | 22/07/2017 على الساعة 09:42
غزلهن محبة بهدوب درناوية !!؟
اشكر الشاعرة علي قصيدتها وعلي دفئ عاطفتها المفعمة بحب الوطن !!! تحياتي م.ب
الليبية الأم | 22/07/2017 على الساعة 00:07
طرابلسية
.. صباحك طرابلسية..راحت غزالتها ..وعوينتها حية..دمعتها علي خدها..و تحت قوصتها غصة...زعما؟ صيورها تزهى..و علي شطها وهنشيرها ترسى..برجالها..ورياسها تتعافر مع الموج ..باش التاريخ يخط كواغطه...وتتبسم سرايتها..
شاعر | 21/07/2017 على الساعة 19:55
مجاراة الشاعرة في عشق " بلد الطيوب "
ردينا السلام بحروف بنغازية /وياعين طيبك جيّه / صباح الموده / للي عزاز عليّا / صباح المحبة /صباح ليبي يسلم علي ليبيه ... """ يا وطن ديمة شوق /تسلم لنا ياوطن / انت اللي معشوق / صباح ليبيا/بحروف بنغازية /صباح ليبي يسلم ليبية ... """ صباح السلام الدايم /صباح لخرزة عيون الحايم /صباح الغلا /والعقل مطراه فيها هايم /بوطنا ليبيا /بشوووق شاكع انوار بضية ... "" صبحن ناير/ من ملاقاة من الليعلينا جاير /باعث سلامه /شايل معاه مواير/ سريب الغلا / يا ليبيا /جحدهن فضْحنّا لحاظ الغيه... "" لحاظ مرادي /عيون ليبيا لوساع /عيون عسل تسقيك / بكاس المحبة/ شلال درنة وادي /يطرب لها النسري والفل / والياسمين /والعيشة في ليبيا رايقه وهنيّه ... "" صبحن رائق /بعد ما وصلها سلامن /جلا علي القلب ضوايق / جاها الفرج /وفرحة بلادي ليبيا /وبها العين فارحه بالجيه "" صباح حنيّن /صباح الغلا /ومن العين منها مبين /شبيه الريم /اللي غزال اقنين /يا حن ليبيا /غزلهن محبة بهدوب درناوية """ زهتلك ديمة /سلامن وصلها /من بوخجل / دايم حلوها التبسمة /يا ليبيا ايهي صفتلك ديمة / والصبح ناير/من عاشق الليبيه /صباح ليبي
آخر الأخبار